கனவில் தொலைந்த நிஜங்கள்...!

நேற்றிரவு பெய்த மழை!

2011-03-15T05:48:00.000-07:00

நேற்றிரவு பெய்த மழையில்

தலை துவட்டிக்கொண்ட அடர்மரங்கள்

குளித்து அழுக்ககற்றிக்கொண்ட சாலைகள்

புகைப்படலம் நீங்கிய கட்டிடச்சுவர்கள்

பூத்துச்சிரிக்கும் வேலியோர மலர்ச்செடிகள்

தேங்கியிருக்கும் நீரில் குதித்து

விளையாடிக்களிக்கும் சேரிச்சிறுவன்

வேதனை....

மழைக்குமில்லை

மழலைச் சிறுவனுக்குமில்லை...

மௌனமழை...!

2011-03-11T01:10:00.000-08:00

நிதமும் தான் நான்

நனைகிறேன் என்றாலும்....

ஒவ்வொரு நாளும்

ஒவ்வொரு அர்த்தங்களைப்

பொழிகிறது உன் மௌனம்...

Image Courtesy :- Google

குறும்பா...!

2011-03-08T00:45:00.000-08:00

உள்ளக் கவலை துடைக்கும்

உப்புத்தண்ணீர்

கண்ணீர்...

வசந்தத்திற்கும்

வறுமையோ

...கோடை வெயில்

Image Courtesy :- Google

ஓர் இதயத்தவம்...!

2011-03-02T02:34:00.000-08:00

உன் நினைவுகளைப் பதியமிட்டு

கண்ணீரூற்றி வளர்க்கிறது பிரிவு...
நம் காதலை...

என் முட்பாதையிலும்

பூக்கள் முளைக்கிறது...

இந்தப் பாலை மனத்திலும்

சோலை மணக்கிறது...

உணர்வுக்கருவில்

உதித்த இம்மலருடன்

உனக்கெனச் செய்வேன்

ஓர் இதயத்தவம்...

நீ வரும் வழி நோக்கி...!!!

Image Courtesy:- Google.

௨ ௪ ௭...

2011-02-17T03:33:00.000-08:00

ஒவ்வொரு பொழுதும்
ஓடோடி வந்து

காதோரக் கூந்தல்
கலைத்துப் பேசிய கொஞ்சல்களும்...

உடல் சிலிர்க்கச் செய்த
குளிர் தீண்டல்களும்...

ஆடை கலைத்துச்
சீண்டிய செல்லக்குறும்புகளும்...

இன்னும்...

சுவாசமாகிச் சேர்ந்து
உதிரத்தில் உயிர் வரைந்த

காற்றே!!!

உன்னைக் காதலிக்கிறேன்....

தலைப்புக் குறிப்பு : ௨ ௪ ௭ (2 4 7 - நான் உன்னைக் காதலிக்கிறேன்)

Image Courtesy : Google

இ(க)யலும் இசையும்...!

2011-02-15T04:11:00.000-08:00

தண்ணீர் குளத்தில் என்
கண்ணீர் கரைய
காலமெல்லாம் நீந்தியும்
கரை விரும்பாக் கயல் நான்...

இமைக்காத விழிகளின்
பாரம் தீர

இசைக்கவந்தாயோ நீருக்குள் ராகம்...!

கண்ணீருக்கு மருந்தாக
கவலைக்கு விருந்தாக
தனிமைக்குத் துணையாக

சோகம் உடைத்து
ஸ்வரம் பாட
என் தேவன் தந்த வீணையோ நீ!!!

Image Courtesy : Google

குறும்பா...

2011-02-12T05:06:00.000-08:00

குடைக்குள் மழை
ஏழையின்
வறுமைப் பிழை...

Image Courtesy : Google

பார்வை....!

2011-02-09T23:31:00.000-08:00

பற்றவைக்கப்படாத
தீக்குச்சியாய்

மிரட்டிக்கொண்டிருந்த
நினைவுகளைப்
பட்டென்று உரசிச்
சாம்பலாக்கியது

உன் பார்வை....!

Image Courtesy : Google

மழைக்காலம்...!

2011-02-05T03:32:00.000-08:00

எறும்பின் வாயில்
கிட்டிய உணவாய்...

உன் நினைவுகளனைத்தும்
என் இதயக்கிடங்கின் சேமிப்பில்...

எந்த நேரமும் வரலாம்
கண்ணீர் மழைக்காலம்...!

Image Courtesy : Google

ஒத்திகை...

2011-01-28T03:45:00.000-08:00

இரவுகள் தோறும்
இருவிழிகளின் தியானத்தில்
இறுதிப் பயணத்திற்கு
ஒத்திகையோ...
நித்திரை.....!!!

Image courtesy - Google

செல்லக்குறிப்புகள்....!

2011-01-22T04:31:00.000-08:00

சோடி இழந்த செருப்பு
கிறுக்கல் சுவர்
மீசை முளைத்த புத்தகப்படங்கள்
உரக்கச் சொல்கின்றன - இது
குழந்தைகள் வாழும் வீடு...!

படம் - இணையத்தின் உதவியில்...

காதல்...

2011-01-19T23:07:00.000-08:00

விழிச்சிப்பிக்குள்
விழுந்துவிட்டாய்
பார் அன்பே...
கருமுத்துக்களாய் ஒளிர்கிறது
என் காதல்....

உழவர் திருநாள்...

2011-01-12T23:49:00.000-08:00

எண்ணம் சிறக்க
பசுமை செழிக்க
செல்வம் பெருக
பொங்குக பொங்கல்...

இணைய உறவுகள் அனைவருக்கும் இனிய உழவர் திருநாள் வாழ்த்துக்கள்....

--
அன்புடன்
கவிநா...

திரும்பிப் பார்க்கிறேன் -- 2010

2011-01-10T03:26:00.000-08:00

கடந்த வருடத்தில் (2010) நடந்த நிகழ்வுகளைப்பற்றி தொடர்பதிவெழுத அழைத்திருந்தார் கௌசல்யா அக்கா. அவருக்கு என் நன்றிகள்.

இதுவரை கவிதைகள் மட்டுமே எழுதி வந்த என் வலைப்பூவில் வித்தியாசமான முதல் பதிவு இது.
என்னால் எழுத முடியுமா என்ற கேள்விக்குறியுடன் தான் ஆரம்பித்திருக்கிறேன்.

வலைப்பூ

2007 -ஆம் வருடத்திலேயே எனது வலைப்பூ பயணம் ஆரம்பித்திருந்தாலும், மற்ற நண்பர்களின் வலைப்பூக்களை அதிகம் வாசிக்க வாய்ப்பளித்தது இந்த 2010 தான். அந்த விதத்தில் இது எனக்கு மிகச்சிறந்த வருடம்.

அடுத்து, ஓவியக்காதல் என்ற என் இன்னொரு வலைப்பூவை துவங்கியதும் இந்த வருடம் தான்.

நட்புறவுகள்

பொதுவாகவே இணையம் என்றாலே பெண்களுக்கு ஏற்படும் பயத்துடன் தான் என் பயணமும் துவங்கியது. ஆனால், எனக்கு வாய்த்த சகோதர சகோதரிகள், தோழர் தோழிகள் அந்த ஐயத்தைத் துடைத்துவிட்டனர். கடந்த வருடத்தை திரும்பிப்பார்க்கும் வேளையில் என்றும் என்னுடன் கைகோர்த்து ஊக்கமளிக்கும் உள்ளங்களையும் நினைவுகளையும் நெஞ்சம் துடிக்கிறது.

நண்பர்கள் விஷ்ணு, விஜய், சீமாங்கனி, D.R.அசோக், சரவணன், கணேஷ் தோழிகள் தென்றல், ஹேமா, பூங்குழலி அக்கா, கௌசல்யா அக்கா இன்னும் பல உள்ளங்கள் என் எழுத்துக்களைப் படித்து அவற்றைச் செம்மைப்படுத்த ஊக்கமளிக்கின்றனர். அவர்களுக்கு என் நன்றிகளையும் சமர்ப்பிக்கிறேன்.

ரசிக்கும் எழுத்துக்கள்

நான் தொடரும் வலைப்பூக்கள் பெரும்பாலும் கவிதைகள் பற்றியதாகத்தானிருக்கும். அதில் சில விதிவிலக்குகள் என்றால், கணேஷ்-இன் வலைப்பூ, மற்றும் கௌசி அக்காவின் "மனதோடு மட்டும்".
கணேசின் நகைச்சுவை கலந்த அறிவியல் பிடிக்கும். கௌசி அக்காவின் மனதோடு பேசும் எழுத்துக்கள் பிடிக்கும்.
சரவனக்குமாரின் "பார்த்ததும் படித்ததும்" வலைப்பூ. அவர் படித்து ரசித்ததையெல்லாம் எழுதுகிறார். இப்போது கொஞ்ச நாட்களாக சுயமாக நிறைய விஷயங்களை பதிவிடுகிறார். சரவணன் எனக்கொரு நல்ல நண்பன்.
விஜய் அண்ணாவின் கவிதைகள், அவை என்னால் விமர்சிக்கமுடியாத உயரத்தில் இருப்பவை. அவரின் எழுத்துக்களைப் படிக்க நான் அகராதி ஒன்றை வாங்குவதாய் இருக்கிறேன். :)
இன்னும் நான் ரசிக்கும் பல வலைப்பூக்கள் இருக்கின்றன.

என் டைரி

நிகழ்வுகளைப் பதிய
நேரமில்லை
நினைவுகளைப் பதிகிறேன்
கவிதைகளாக்கி....

இணையம்

இணையம் இன்னுமொரு தனி உலகம். எழுத, படிக்க, பகிர, மகிழ, அறிய, வாழ அத்தனைக்கும் வழிவகுக்கும் மற்றொரு பூமி.
இந்த பூமியில் காலாற உலவ 2011 நம்மை வரவேற்றிருக்கிறது. அனைவருக்கும் இவ்வருடம் இனிதாக அமைய நல்வாழ்த்துக்கள்...

தொடர்பதிவெழுத யாரையேனும் அழைக்கவேண்டுமே!!??

எனக்குத்தெரிந்த பலரையும் பலர் அழைத்துவிட்டதால் தொடர்பதிவின் இலக்கணத்தை மீறுகிறேன். மன்னிக்கவும்... :(

பின்குறிப்பு:-

வெற்றுப் பக்கங்களே
விதியாய்க் கொண்டு
என்னிடம் அடைக்கலமான
என் டைரி....

இந்த நிலை மாற,
இந்த வருடமாவது உருப்படியாக சொல்லும்படி எதாவது செய்வேன் என்ற நம்பிக்கையில் 2011 -ஆம் வருடத்தை பூத்தூவி வரவேற்கிறேன்... :)))

வண்ணத்துப்பூச்சி...

2011-01-08T04:35:00.000-08:00

இறகுச் சுவற்றில்
வரைந்து வைத்த
வண்ணச்சித்திரம்...

தேர்ந்த ஓவியனின்
எண்ணக்குறிப்போ...!!!

கனவுகள் கவர்ந்த உறக்கம்...

2010-12-18T06:38:00.000-08:00

எங்கோ இலக்கின்றிச் செல்லும்
பறவையின் நுனிச்சிறகைப்
பிடித்துக்கொண்டு பறப்பதாக ஒரு கனவு...

இருண்மை தேசத்தில்
வெடித்தெழும்பும் ஒளிப்பிரளயத்தினின்று
தேவதை உதிப்பதாக ஒரு கனவு....

கைப்பறித்து மண்ணிலிட்ட விதை
நீர் விடும் முன் நெடுமரமாக
நிமிர்வதாய் ஒரு கனவு...

கனவின் பொருள் புரியாமல்
சாமத்தில் விழித்தெழும்
சாபம் பெற்றவளாய் நான்...

மழை...

2010-12-10T03:36:00.000-08:00

உள்ளத்து ஆசைதனை
மண் சேர்க்கத்துடிக்கும்
மேகத்தின்
கண்ணீர் விடு தூது...!

விழியோரம்

2010-12-06T22:54:00.000-08:00

உன் நினைவுகளென்ன
சுமைதாங்கியா!

வருடிச்சென்றதும்
வழிந்தது பாரம்

விழியோரம் ஈரமாய்....!

தூறல்...

2010-12-01T00:08:00.000-08:00

சாலைக்குழியில் தஞ்சமடைந்த
மழை நீரும்
அதனை அலைபாயவைக்கும்
மரத்தூரலுமாய்

என் இதயமும்...
உன் காதலும்...

இறகைப்போலே...!

2010-11-28T21:10:00.000-08:00

தவழ்ந்துவரும் காற்றில் மிதந்து
திசைகளெங்கும் திரியும்
இறகைப்போலே...

பிரியங்களைச் சுமந்த
என் எண்ண அலைகள்
உன் சுவாசக்காற்று தேடி வருகிறது...

மனவாசல் திறந்து வைக்க
மறவாதே...!

நம்பிக்கை

2010-11-24T02:43:00.000-08:00

பேருந்து நிறுத்தத்தின்
பெருநெரிசலில்
கிடைத்ததொரு சிறுமூலையில்
கடை விரித்துக் காத்திருக்கும்
கிழவியின் கண்களில்...

குறும்பா ...

2010-11-17T23:52:00.000-08:00

சாவு வீட்டிலும் சந்தோசம்
எச்சில் இலை கண்ட
நாய்களுக்கு...

இரவுகள்...

2010-11-12T23:45:00.000-08:00

சயனம் தொலைத்தே
சரிகின்றன என் இரவுகள்...

குருதியில் தோய்த்த
என் கனவுகளைக் கவர்ந்து
விடிகிறது வானம்...

எப்போதும் போல்
என்னைக்கடந்துபோகும் மேகங்களுக்குள்
இரக்கமற்ற புன்னகையுடன் நீ...!

தீபாவளித் திருநாள்!

2010-11-03T01:10:00.000-07:00

நண்பர்கள், சகோதரர்கள் அனைவருக்கும் என் இதயங்கனிந்த தீபாவளித் திருநாள் நல்வாழ்த்துக்கள்....

என்றும் அன்புடன்
உங்கள் தோழி,
கவிநா....

பிரிவுத்தூறல்...!

2010-10-26T05:44:00.000-07:00

தூறும் மழைச்சாரலும்
உன் புன்னகையும்
ஒன்றெனவே தோன்றியது
நம்முடன் கைகோர்த்து நாட்கள் நடந்தபோது...

இன்று...

நாட்காட்டிக் காகிதங்கள்
என்னைக் கிழித்துத்
தன்னைத் தொலைக்கிறது...

இன்றும் உன்னை ஒப்பிடுகிறது மனது...

வெடித்துக்கிடக்கும் நிலத்தைப்பார்த்து
வெளிரிச்சிரிக்கும் மேகத்தோடு...!

உடையும் கனவுகள்!

2010-10-22T00:28:00.000-07:00

மஞ்சள்வெயில் மாலையில்
மெல்ல நகரும் முகில்கள்...
காற்றோடு
பட்டும் படாமலும்
தொட்டும் தொடாமலும்
உரசிச்செல்வதைப்போல

என் நெஞ்சமெங்கும்
உன் நினைவுகள்...

சோப்புக்குமிழிகளாய்
உயிர்பெறும் உன் நினைவுகளைச்
சிறுகுழந்தையாகிச் சிலாகிக்கிறேன்...
உடைந்துவிடும் எனத்தெரிந்தும்...

குறும்பா....

2010-10-13T23:44:00.000-07:00

பரமன் பாம்புக்குப் படி அளந்தான்
பலியாகிப்போனது தவளை
மழைக்கால இரவு...

உன் நினைவின் சக்தி...!

2010-09-16T00:37:00.000-07:00

விரத நாட்களின் பசியாக
விடுமுறை நாட்களின் பணியாக

இம்சித்துக்கொண்டிருக்கிறது
இதயத்தை
உன் நினைவுகள்...

கடல் தாண்டும் பறவைபோல்
மலை தாண்டும் முகிலைப்போல்

ஓயாமல் இயங்கிக்கொண்டிருக்கும்
உன் நினைவுகளுக்கு
ஆற்றல் அதிகமே!...

ஹைக்கூ...

2010-07-19T23:34:00.000-07:00

நேற்றைய நிகழ்காலத்தைச் சிறைப்பிடித்த
இன்றைய இறந்தகாலம்
புகைப்படம்...

கனவோடு வா...

2010-07-15T05:34:00.000-07:00

விளக்கு உமிழும் வெளிச்சத்தில்
நிறம் மாறும் சுவர்ப்பூச்சு...

ஓயாமல் சுழன்று
பெருமூச்செறியும் மின் விசிறி...

காற்றின் வேகத்தில் படபடத்துச்
சிரிக்கும் நாட்காட்டிக் காகிதங்கள்...

அயராது உழைக்கும்
கடிகார முட்களின் காலடி ஓசை...

என,

உயிரற்ற பொருட்களெல்லாம்
உயிர்ப்புடன் உலவிக்கொண்டிருக்க...

என் உறக்கத்திற்கும் உயிர்கொடுக்க
உன் கனவுகளைப் பரிசளித்தது இந்த இரவு...!

இரவோடு வரும் கனவோடு வா உயிரே...!!!

எதிர்த்துருவ விழிகள்...!

2010-07-07T05:30:00.000-07:00

ஓடும் நீரையும் சிறைபிடிக்கும் புகைப்படமாய்...
நகரும் என் நிகழ்காலத்தைச்
சிறைபிடிக்கிறது உன்
காதல் கயல்விழிகள்...

எனை வஞ்சிக்கும் என்னமோ வஞ்சியுனக்கு?
காதற்பஞ்சும் கன்னி உன்
பார்வை நெருப்பும்
பற்றிக்கொண்டு எரியுதடி
பரந்த என் நெஞ்சில்...

உன் ஒற்றைத்துளிக் கண்ணீர்
எனக்கெனச் சுரந்தால் போதுமடி...
என் நெஞ்சத்து நெருப்பணைத்துக் குளிரூட்ட...
தீயாய் நீயும், நீராய் நானும்
நீ என்னை எரித்துக்கொண்டும்!
நான் உன்னை நனைத்துக்கொண்டும்!

எதிரெதிர்த்துருவங்கள் ஈர்க்குமாமே!
நீ என்னை ஈர்க்கிறாய்...
உண்மையைச் சொல்...
நான் உன்னை???...

கூ... கூ... ரயிலே...

2010-06-30T05:57:00.000-07:00

தினமும் செய்யும் சமரச முயற்சி
என்றும் இணையா தண்டவாளம்
தொடரும் முயற்சியாய்
ரயிலின் பயணம்...

ஹைக்கூ...

2010-06-24T00:02:00.000-07:00

தென்றல் தொட்டதும்
தன்னையே மாய்த்துக்கொள்கிறதோ
பத்தினி தீச்சுடர்...!

நன்றி...

2010-06-23T23:31:00.000-07:00

தன்னைத் தருவித்த
மண்ணுக்குத் தலைவணக்கமோ...
தானே உதிர்ந்து
மண்ணைத்தொட்ட மலரிதழ்கள்!..

பிரிவு!!!!

2010-06-18T22:04:00.000-07:00

எச்சில் விழுங்கி
ஈரப்படுத்திக்கொண்ட தொண்டையில் - இன்னும்
மிச்சமிருக்கிறது
உனக்கான என் அழுகை...

நீ என்னைப் பிரிந்தநாளின் துயரம் - என்
மனச்சுவற்றின் மேல் எம்பிக்குதிக்கிறது
உன்னுடனான இனிய நினைவுகளால்
மனச்சுவற்றின் உயரத்தை நீட்டித்துக்கொள்கிறேன்...

உண்மை சொல்லி - மனம்
உரக்கக் கத்தினாலும்
கண்ணில் வழியும் கண்ணீர் - அதன்
சத்தத்தைத் தன்னோடு கரைத்துக்கொண்டோடுகிறது...

அநாதை...

2010-06-04T01:35:00.000-07:00

முகவரி இல்லாக் கடிதம்...
தனித்து மேயும் ஒற்றை ஆடு...
நெடுக உயர்ந்த பட்டமரம்...
கல்லடிப்பட்டு கதறும் நாய்க்குட்டி...
கையேந்தி நிற்கும் தெருவோரச்சிறுமி...
என்று எங்கேனும் எப்போதும் ஏதாவதொன்று
நினைவூட்டிக் கொண்டேயிருக்கிறது
நான் அநாதை என்று...

என் செய்தாய் அன்பே?

2010-05-05T04:39:00.000-07:00

என் இரவுக்குள்ளே இரைத்துவிட்டானோ
வானவில்லின் சாயங்களை
கனவுகள் எல்லாம் வர்ணங்களில்...

என் இதயத்துக்குள்ளே இசைக்கவிட்டானோ
காட்டுக்குயிலின் கானங்களை
துடிப்புகள் எல்லாம் ராகங்களில்...

என் உயிருக்குள்ளே உலவவிட்டானோ
நிம்மதியின் சாரங்களை
நினைவுகள் எல்லாம் சொர்க்கங்களில்...

சிறை...

2010-04-30T01:28:00.000-07:00

உனைச் சிறைவைப்பேன்
இரு இமைகளுக்குள்....

காதலனே....!

என் உறக்கம் திருடிய
கள்வன் நீ..!

மேகக்காதலி...!

2010-04-26T05:32:00.000-07:00

மிதக்கும் மேகங்களில்
ஒருத்தியாய் நான்...

காற்றின் அசைவுக்கு நகர்வதாய் - உன்
காதலின் அசைவுக்கு இசைகிறேன்...

உன்னில் பருகிய காதலை
மண்ணில் பொழிகிறேன் மழையாக...

மண்ணைச்சேர்ந்த காதல் மழை
மீண்டும் என் மடிசேர்கிறது...

இதோ...

மிதக்கும் மேகங்களில் ஒருத்தியாய்
மீண்டும் நான் - உன்

காதலைப் பருகப்பருக...
தீராத தாகத்தில்...

படம் உதவி - நன்றி நண்பர் விஷ்ணு...

கொலுசு...!

2010-04-24T04:26:00.000-07:00

என்ன தவம்தான்
செய்து வந்ததோ...?! - உன்
வெள்ளிக்கொலுசுகள்...
துள்ளி விளையாடும் -
உன் பாதங்களைக்
கிள்ளி உறவாடிக்களிக்கிறதே...!!!

காதல் சிற்பம்!

2010-04-18T02:44:00.000-07:00

கருவிழிக் கணைபட்டு
உருகியது எனதுள்ளம்...!!!

வழிகின்ற இதயத்தை வழித்தெடுத்து
வடித்துத் தருவாயா
களங்கமில்லாக் காதல் சிற்பத்தை...?

என்
ஆயுள் மேடை
ஆயத்தமாயிருக்கிறது...
அலங்கரிக்கவரும்
அற்புதக்காதலை நோக்கி...

ஹைக்கூ

2010-04-09T04:59:00.000-07:00

கணவன் இறந்ததால் விதவைக்கோலமோ
வெள்ளைத் தாளின் மேல்
மைதீர்ந்த பேனா...

கனவுக்குழந்தை...!

2010-01-30T00:30:00.000-08:00

என் கனவுக்கு உயிர் கொடுத்த
காதலே...

உறக்கம் என்பதே
இறந்தகாலம் என்றாகிவிட்டது
எனக்கு...

என் கனவுக்குழந்தையிடம்
கண் சிமிட்டி விளையாடி...
கதை பேசி தூங்கவைக்க...

கூட்டிவருவாயா என் காதலியை...!

மலடியின் மனது... (மலடி இவளின் துணைப்பெயர்)

2009-12-10T04:23:00.000-08:00

கல்லெறிந்த குளமாய் மனம்
கலங்கித்தான் போகிறது...

மலடி எனும் மூன்றெழுத்தே
என் பெயராகிப் போனதில்...

எரியூட்டப்பட்ட சிதையாய் மனம்
எழுந்தாலும் இறுதியில்
எஞ்சுவதென்னவோ கொஞ்சம்
மௌனச் சாம்பலே...

மகரந்தம் சுமக்கும்
மலராகப் பிறந்திருக்கலாம்
மண் துளைத்து முளைக்கும்
விதைகளை ஈன்றிருப்பேன்...

மழைத்துளிகளை தாங்கும்
சிப்பியாகப் பிறந்திருக்கலாம்
மணிக்கழுத்தில் தவழும்
முத்துக்களை ஈன்றிருப்பேன்...

பெண்ணாகப் பிறந்து
மண்ணாகிப் போன வயிற்றால்...

கவலைக் கருவைச்சுமக்கும் என்
கண்கள்...
கண்ணீர்த் துளிகளை அல்லவா
பிரசவிக்கின்றன..?!

தேவதையின் வரம் கேட்ட எனக்கு...
சாத்தானின் சாபமே
சாஸ்வதமாகிப் போனதேன்?

அந்த தேவதை என்போல்
பெண்ணில்லையோ... - இல்லை

அவளுக்கு இதுபோல்
விதியில்லையோ...

தெய்வமே உனக்கு
விழியில்லையோ...

தென்றலே என்வாசலில்
வழியில்லையோ...

--- உரையாடல் கவிதைப் போட்டிக்காக எழுதிய கவிதை இது...

காதல்!....

2009-11-18T05:02:00.000-08:00

நினைவுகளின் மனனம்

கனவுகளின் பயணம்

ஆசைகளின் ஜனனம்

ஆன்மாக்களின் சரணம்

காதல் ஒரு புதினம்!...

காதல் நினைவே!

2009-11-18T04:58:00.001-08:00

உன் நினைவுகளைத் தேடிப்

பயணிக்கிறது என் நெஞ்சம்…

காரிருள் மெளனத்தைச்

சுமந்த கருவேலங்காட்டின்

அடர்ந்த நிழல் வடிகட்டி அனுப்பிய

சன்ன வெயிலாய்…

மேகங்களைத் தொட்டுவிட்ட

மலையின் மேனியைத்தொட்டு

பூத்துச் சிரிக்கும் மலர்களின்

புன்னகையை வருடிவந்து

சலசலக்கும் நீரோடையாய்…

ஆள் அரவமற்ற கானகத்தில்

அடர்ந்து படர்ந்து

பாரியிடம் தேர் பெற்ற

முல்லைக் கொடியில் முகிழ்த்த

முதல் பூவாய்…

என்றும் சுகமாயும் சுகந்தமாயும்

உணர்கிறேன் உன் நினைவுகளை… - நீயும்

கவர்கிறாய் என் கனவுகளை….

பாதங்கள்…

2009-11-18T04:57:00.000-08:00

கருவறையை உதைத்து

கவலைகளை உடைத்து

அறிவைத் தேடி அன்பைத் தேடி

ஒரு பயணம்…

கல்வியைத் தேடி காதலைத் தேடி

ஒரு பயணம்…

பொருளைத் தேடி புகழைத் தேடி

ஒரு பயணம்…

பொறுப்புகள் சுமந்து புண்ணியம் தேடி

ஒரு பயணம்…

கருவறை தொடங்கி

கல்லறை நோக்கி

பாதங்களின் பயணம்…

தேடல்களின் பயணம்…

காலத்தின் மறதி....

2009-11-18T04:54:00.000-08:00

காலம் மறக்கச்செய்ய மறந்துவிட்ட

பல நினைவுகளின் எச்சங்கள்

மனதின் மூலையில் மலைக்குன்றாய்

பாதையில் வரும்

பனிக்காற்றும் பூஞ்சோலைகளும்

முட்செடிகளும் புதர்காடுகளும்

தோண்டிப் பார்க்கவே செய்கின்றன

புதைந்திருக்கும் நினைவுகளை

எனக்கான ஒவ்வொரு

விடியல்களிலும் பொழுதுகளிலும்

காலதேவன் முன் மண்டியிட்டு மன்றாடுகிறேன்

அத்தனை நினைவுகளையும் அள்ளிச்செல் என

ஆனாலும் நினைவெச்சங்கள் எச்சங்களாகவே

நிகழ்வின் கணங்களை அச்சுறுத்திக் கொண்டே….

நிஜத்திற்காக…

2009-11-18T04:46:00.000-08:00

பார்வை தொடும் தூரத்தில்

பாவை நீ இருந்தும் - இந்த

பாவி மனம் உன்னை நினைப்பதிலேயே

நெடுங்காலம் கழிக்கிறது

உன் மெளனம் மொழியாகிட

விழிகள் கவிபாடிட

நிகழப்போகும் நிஜத்திற்காக

காத்திருக்கும் என் மனம்

பல கனவுகளோடு….

உள்ளப்பூவே!

2009-11-16T03:17:00.000-08:00

அவள் கோலமிட்டு முடிக்கையில்
சிறையாகிவிட்டிருந்தேன் அவளிட்ட
கோலத்தின் கோடுகளுக்குள் புள்ளிகளாய்...

அவள் பின்னலிட்டு முடிக்கையில்
சிறையாகிவிட்டிருந்தேன் சீவிமுடித்த
சிகையின் சிக்கலுக்குள் மல்லிகையாய்...

அவள் மாலையிட்டு மணமுடிக்கையில்
சிறையாகிவிட்டிருந்தன மலர்கள்
என் கைகளுக்குள் அட்சதையாய்...

என் உள்ளத்துக்கும் உள்ளங்கைப்
பூக்களுக்கும் மட்டுமே தெரியும்
இது ஒருதலைக்காதலின் திருவிளையாடலென்று...

கனவுக்குள்...

2009-11-16T03:08:00.000-08:00

நேற்று என் கனவில் நீ இல்லை!...

விழிகளுக்குள்ளே நீ விளையாடிக்கொண்டிருக்க
உறக்கம் எங்கே வருகிறது
கனவுகள் காண?

உறங்காத என் கண்களுக்கு ஓய்வுகொடு..
இன்றொரு நாள் இடம் மாறிவிடு...

கண்களுக்குள்ளிருந்து கனவுக்குள்..

உறங்கிக்கொள்கிறேன் ஒரு நாளாவது...

நீ + நான் = நாம்!

2009-11-14T04:33:00.001-08:00

என்னவளே!

சொல்லத்தெரியாத என்
காதலைப் பற்றி
விழித்தே இருக்கும் என்
விழியைக் கேளடி!
நினைத்தே கிடக்கும் என்
நெஞ்சத்தைக் கேளடி!
புசிக்காமலே இருக்கும் என்
பசியைக் கேளடி!
மௌனித்தே இருக்கும் என்
மொழியைக் கேளடி!
இதனைத் தெரிந்தும்
தெரியாமல் நடிக்கும்
உன் இதயத்தைக் கேளடி!
நான் சொல்லாமலே அறிவாய்
என்
உன்
நம்
காதலை....

கடலும் காதலியும்...!

2009-11-14T04:27:00.000-08:00

கடற்கரைக் காற்றாய்
அவளின் சுவாசம்...
கடற்கரை நிலவாய்
அவள் கண்களின் குழுமை...
கடலலையாய் தவழும்
அவள் முதுகில் கூந்தல்...
ஆழ்கடலின் வலம்புரியாய்
அவள் அழகுத் தேன்குரல்...
கடலுக்கும் என் காதலிக்கும்
என்ன சம்பந்தம்?!
நான் முழுவதுமாய் மூழ்கிவிட்டேன்
அவள் இதயக்கடலின் ஆழத்தில்...

நிழலாய்!

2009-11-12T02:53:00.000-08:00

புல்லாங்குழலைத் தழுவும் புதுத்தென்றலாய்
நகர்ந்துகொண்டே இருக்கும்
உந்தன் நினைவுகள்...

அதனை தொடர்ந்துகொண்டே இருக்கும்
எந்தன் நிழல்...
வெறும் கருப்பு நிழல் மட்டுமல்ல
உன் இதயத்தை கரையச் செய்யும்
காதல் நிழலும் கூட...

நீ வரவேண்டும்...

2009-11-12T02:37:00.000-08:00

ஒற்றைக் கதவறையின்
ஒற்றைச் சாவியையும் தொலைத்துவிட்டு
அடைபட்டுக் கிடக்கும்
அபலையாய் உணர்கிறேன்...
நீ இல்லாத என் வாழ்க்கையை...

குளிர் தென்றல் வீசும்
சன்னல் வெளிச்சமாக இல்லாவிட்டாலும்

கூரை வழியே கிடைக்கும்
சன்ன வெளிச்சமாகவாவது வருவாயா?

என் வாழ்க்கையில் ஒளியூட்ட...

துளிர்க்கும் நினைவுகள்!!!

2009-11-12T02:24:00.000-08:00

அருகம்புல்லாய் ஊன்றிவிட்டாய்
என் இதயத்தில்...

வெட்டிக்கொண்டே இருக்கிறேன்
உன் நினைவுத் துளிர்களை...

வளர்ந்துகொண்டே இருக்கிறது
உன் காதல் தளிராய்...!

நாணமே!!!

2009-11-12T02:15:00.000-08:00

சொல்லத்துடிக்கும் மனதை
மெல்லத்தடுக்கிறது நாணம்...
மனம் அழுகிறது என்றாலும்,
ஊமை கண்ட கனவாய்
உள்ளத்திலே என் காதல்...

விழிகளில் வெள்ளமாய்
வழிகிறது என் உள்ளம்...

கண்ணீரில் நனைந்தது என்
கண்மை மட்டுமல்ல
காவலாய் நின்ற நாணமும்தான்...

இதோ சொல்லிவிட்டேன் என் காதலை...
வென்றுவிட்டேன் நாணக்காவலை...

இனி...
உன் உள்ளங்கையில்
என் உள்ளம்...

ஹைக்கூ!

2009-10-30T06:37:00.000-07:00

குளம் நிறையக் கோலங்கள்
கல் எறிந்தவனின்
கைவண்ணம்...

ஹைக்கூ!

2009-10-30T06:26:00.001-07:00

காகக் கூட்டில்
குயிலின் ஜனனம்...
வாடகை தாய்..

ஞாபகங்கள்!

2009-10-30T06:21:00.000-07:00

உன் பிரிவால் சிதிலமடைந்துவிட்ட
என் உள்ளச்சுவரெங்கும்
உன் ஞாபகச்சிலந்திகள்...

வலையில் சிக்கிய வண்டுணவாய்...
நானும் என் நிகழ்காலமும்
சிதைந்துகொண்டே...

பேசும் காதல்!

2009-10-30T02:40:00.000-07:00

ஊமைக் குழந்தை
உன் கையில்
பொம்மையாகிப்போனேன் நான்...

உன் அசைவுக்கும்
என் இசைவுக்கும் இடையே
ஓயாமல் பேசிக்கொண்டிருக்கிறது
நம் காதல்....

என் வாழ்க்கை...

2008-08-23T08:05:00.000-07:00

கவலைகளை சுமந்து திரிகிறேன்
நினைவுகளில் மூழ்கித் தவிக்கிறேன்
வாழ்க்கையின் பசிக்காக உண்மைகளை விழுங்குகிறேன்
உண்மையின் சக்தி உணர்வுகளாய் கண்களில்...
சிரித்து மறைக்கிறேன் கண்ணீரின் கால் தடங்களை.....

கண்ணீர் கடிதம்!!!

2007-10-13T08:51:00.000-07:00

மறக்க முடியாத மந்திரப் பொழுதுகள்
என் மனதில் மல்லிகையாய் மணம்வீசுகின்றன.
மந்திரத்தில் கட்டுண்டு கிடந்த மனதின்
மயங்கிய தருணம் உன் நினைவுகள் வருடுகிறது.
வருடிய நினைவுகள் தென்றலாய் தழுவுகிறது.
தென்றல் தழுவும்போது மொட்டுக்கள் திறக்கலாம்
ஆனால், உன் நினைவுகள் தழுவும்போது கண்ணீர்
முத்துக்கள் பிறக்கின்றன.
கண்ணீர் முத்துக்கள் கன்னம் வருடும் வேளை
சோகம் அனைத்தும் தண்ணீராய் ஓடிச்சென்று
உள்ளக் கிணற்றில் நிறைகிறது.
ஊசித் தூறலில் உடல் கீறும் குளிராய் உன்
மறுதலிப்பு வார்த்தைகள் என் உயிர் கீறி வதைக்கிறது.
சுகம் தரும் இளவெயிலாய் உன் சம்மதம் எனைச் சேராதா?

சில நேரங்களில்!!!

2007-10-12T06:04:00.000-07:00

சில நேரங்களில்!!!
ஊமை விழிகளின் உயிர்வலி கூட புரிவதில்லை
பேசும் இதழ்களின் பிதற்றல்களும் ஒலிக்கின்றன.
சில நேரங்களில்!!!
நா வறழும் நேரம் நீர் கூட கிடைப்பதில்லை
நீரால் இழுக்கப்பட்டு பிணம் கூட கிடைப்பதில்லை
சில நேரங்களில்!!!
சோகத்தின் தருணங்களில் இரு விழி நீர் கூட விழுவதில்லை
சிரிப்பின் சிகரத்திலும் இதழ் கூட விரிவதில்லை
சில நேரங்களில்
சில நிகழ்வுகளில் - சிக்கித்தவிக்கும்
சில மனிதர்கள்!!!

தரிசனம்!

2007-10-09T08:23:00.006-07:00

ஓடிவரும் ஆற்றின் ஓர் கரையோரம்
காத்திருந்து யாசித்தேன்
கிடைத்தது உன் தரிசனம்
ஒற்றையடிப் பாதையில்
தவழ்ந்து வரும் தங்க நிலவாய்….

உண்மைக் கவிதை!

2007-10-09T08:23:00.005-07:00

உவமைக் கவிதை எழுதிவந்த நான்
இன்று உண்மைக் கவிதை எழுதுகிறேன்
உன் பெயரையே கவிதையாய்!!!

தேடும் நெஞ்சம்!!!

2007-10-09T08:23:00.003-07:00

கவிதை தேடும் என் நெஞ்சம்
உன் கண்களில் முடிகிறது!
அழகைத் தேடும் என் நெஞ்சம்
உன் இதயத்தில் முடிகிறது!
அமைதி தேடும் என் நெஞ்சம்
உன் மெளனத்தில் முடிகிறது!
இசையைத் தேடும் என் நெஞ்சம்
உன் மொழியில் முடிகிறது!
என்னைத் தேடும் என் நெஞ்சம்
அது உன்னில் முடிகிறது!!!

காவியமே!!!

2007-10-09T08:23:00.001-07:00

விரிந்த உன் இதழ்கள்
விவரிக்கும் முன் தெரிவித்துவிட்டன
காவியம் பேசும் உன் கண்கள்!
நீ என்னைத் தேடி வந்ததையும்!
காதல் எண்ணத்தோடு வந்ததையும்!
இன்னும் ஏன் மெளனமடி???

நீ!!!

2007-10-09T08:22:00.001-07:00

வாசிக்கத் தெரிந்த - என்
இதழில் உன் பெயர் மட்டுமே!
நேசிக்கத் தெரிந்த - என்
விழிகளில் உன் முகம் மட்டுமே!
வாழத் தெரிந்த - என்
வாழ்வில் பொருள் நீ மட்டுமே!

அள்ளிச் செல்!!

2007-10-09T08:21:00.000-07:00

அன்பே! உன்னிடம் நான் பேச நினைக்கும்
வார்த்தைகளை விண்மீன்களாய் சிதற
விட்டிருக்கிறேன் வானெங்கும்
என்றாவது ஓர் நாள் மழைக்கால மேகமாய்
வந்து அள்ளிச் செல்லமாட்டாயா என்று!!!

உன் விழிகளில்!!!

2007-09-27T22:28:00.000-07:00

கோவில் மணியாய் என்
குரல் கேட்டதும்
கோபுரம் பறவைகளாய் உன்
இமைகள் படபடக்கும் - அந்த
அழகைக் காணவே
ஆயிரம் முறை உன்
பெயர் சொல்லி அழைப்பேனே
ஆருயிரே!!!

நீ... நிலா!

2007-09-09T21:11:00.002-07:00

நீ சிரிக்காவிட்டாலும் நான் வருந்துவதில்லை! வெண்ணிலா எப்போதும் சிரித்துகொண்டா இருக்கிறது?

தொண்டன்!!!

2007-09-09T21:11:00.001-07:00

கூலிக்குச் செல்லும் தொண்டன் தலைவன் வருகையால் கொடியேற்றச் சென்றான்! கட்சிக் கொடியோ பறந்தது காற்றில் பசி எனும் இடியோ இறங்கியது வயிற்றில்!!!

கானல்!!!

2007-09-09T21:09:00.000-07:00

உன் காதல் சாரலில் நனைய விரும்பினேன்! ஆனால் ஏனோ நீ கானல் நீராய் கண்களுக்கு மட்டுமே காட்சியாய்!

மௌனம்!!!

2007-09-08T07:32:00.001-07:00

புரிந்த மொழி புரியாத பொருள் என்னவளே உன் மௌனம்!!!

சங்கமம்...

2007-09-07T23:30:00.000-07:00

கீதம் ராக தாளங்களின் சங்கமம்... ஓவியம் நிஜ நிழல்களின் சங்கமம்... மௌனம் எண்ணத் தேடல்களின் சங்கமம்....

அன்னை!

2007-08-25T00:54:00.000-07:00

நிலவுக்குள்ளே ஒரு மின்னற்கீற்று என் அன்னையின் முக சிரிப்பு

வருகை....!

2007-07-14T00:10:00.000-07:00

உனக்காக காத்திருக்கும் ஒவ்வொரு நொடிகளும் பிறக்கின்றன ஒவ்வொரு நொடிகளும் இறக்கின்றன இறந்த நொடிகளுக்கும் பிறந்த நொடிகளுக்கும் இடையில் நான் உயிருள்ள பிணமாய் உனது வருகை பொய்தததால்.